Опис
Живописна драма за десетглави кралеви и надземски убави принцези што завршуваат во нивните раце, приказ за битки меѓу доброто и злото во универзум на богови и демони, љубовна поема за додворувања од оној вид што одекнува низ вековите, „Рамајана“ е вториот голем санскритски еп, можеби помал и поприземен, но сигурно попристапен и попопуларен од „Махабхарата“.
Низ повеќе од 24.000 стихови, епот наводно приреден од Валмики, го следи потеклото и растењето на идниот крал Рама, неговата венчавка со Сита и нивниот егзил, средбата со мајмунот Хануман и неговите авантури, грабнувањето на Сита од Ракшасата Равана и, конечно, битката против него и враќањето на престолот.
Овде приопштена посредно според англиската адаптација на Вилијам Бак, оваа верзија на „Рамајана“ е веројатно и најчитаната: упатените тврдат дека потфатот на Вилијам Бак да ја прераскаже во проза е повеќе од успешен. На неупатените им преостанува да се уверат во ова тврдење читајќи го овој превод.