Опис
Нахоко Уехаши, (15 јули 1962), јапонска авторка на романи од жанрот фантастика,
добитничка на повеќе книжевни награди.
Најпознатото епско дело на Уехаши е Морибито, серија од дванаесет фантастични романи, што се продадени во повеќе од десет милиони примероци.
Во 2014 година, Нахоко Уехаши ја добива наградата „Ханс Кристијан Андерсен“ за нејзиниот „континуиран придонес“како автор на книги за деца и млади.
Морибито: чувар на духот е првиот роман од серијата Морибито, што е подоцна адаптирана и за радио, за ТВ како јапонска аниме-серија и во манга-стрип. Во светот што е поделен на две рамнини, две царства – Сагу, видливиот свет на луѓето, и Најугу – невидливиот свет на духовите, се сретнуваме со Балса, вешта копјаничка и телохранител. Откако случајно ќе го спаси принцот Чагум од сигурна смрт, нејзината судбина ќе се промени. Таткото на Чагум, микадото (божествениот владетел на земјата Ново Јого), е оној што ја нарачал неговата смрт, па Балса станува телохранител на Чагум и поаѓа со него на едно тешко и погубно патување. Додека патуваат низ земјата Јого, тие ја откриваат мистериозната поврзаност на Чагум со еден легендарен воден дух…