Опис
„Галаад“ е измислена автобиографија на главниот лик, свештеникот Џон Ејмс, најстариот конгрегационистички пастор во малото и осамено гратче Галаад во Ајова, кој се соочува со неизлечива срцева болест. На почетокот од приказната, Ејмс објаснува дека пишува своевидна хроника за сопствениот живот, што ќе му остане за спомен на неговиот седумгодишен син по неговата смрт. И покрај личното страдање и свесноста за сопствените ограничувања, своите размисли Ејмс ги претставува на прониклив начин и од состојба на апсолутно спокојство. Во целиот роман, јасно е изразена страхопочитта кон трансценденталниот патос, во малите моменти на среќа и мир со својата жена и со синот во гратчето Галаад, наспроти осаменоста и тагата што ги чувствува поради фактот дека го напушта светот со нецелосни и недовршени работи. И покрај сè, Ејмс е во состојба да ужива во убавината на светот околу себе и да најде време да ги цени и да се занимава со малите чуда на животот во заминување.